E kölsch Verzällche - Testen Sie Ihr Kölsch! Der Arztbesuch

Et Breuers Kättche leef met de Johre mih un mih bei der Dokter un wann et heimkom, dann kräch singe Mattes alles verzallt. Der Mattes es ene ärch jenöchlije un räuhije Minsch, nor dat hä en bessjen Denkmoleste hät. No kom et allt ens widder opjerääch om Flur, bal ohne ze odeme vum Laufe met: „Mattes, weiß do, wat der Dokter mer jesaat hät: dat minge Blotdrock widder jeklommen es.“
„Un wohin es dä jeklomme, Kättche?“ – „Der Dokter hät en jemesse, Mattes.“
„Kättche, woher weiß dä Dokter, dat hä dingen Blotdrock messe muss?“ – „Weil ich en letzter Zick suvill Kopping han.“
„Kättche, häs do dann jetz me’m Kopp ze dun?“ – „Ich?“ – Dobei saat et janz höösch för sich selver: „Jenöch et nit allt, dat einem vun uns e paar Schruve fähle.“
„Kättche, wo müssen e paar Schruve fassjedriht wäde? Beim Dokter? För dingen Blotdrock ze messe?“ – „Minge Kolesterinspejel wör zo huh. Ich möt avnemme. Stell deer ens vör. Kaum dat ich ens zwei Däg hingerenein op enem Jebootsdagskaffe wor …“
„Met enem Ovendesse donoh“, reef hä löstich dozwesche. – „Nu jo, schleeßlich hatt ich jo och en Jeschenk metjenomme“, kom die Antwoot vum Kättche zoröck. Donoh reef hä: „Kättche, wo wells do dä Kolesterinspejel dann hinhänge?“ – „Mattes, an enem Kolesterinspejel kann der Dokter och sinn, wie vill Fett mer ze vill em Liev odder och em Blot hät. Un ich möt en bessje Diät enhalde.“
„En bessjen?“, frochten hä ameseet. „Morjends en Schiev jekochte Schinke op en Brütche, dat eine Ei un die zwei Löffelcher Haferflocke met Hunnich dodrop. Dat es doch nit ze vill. Wann do do- drop erusjeihs, dann bruchen ich üvverhaup nix mih zo käue. Wie soll ich domet mingen Stoffwääßel en der Jreff krijje.“ Jetz wood der Mattes och en bessje lauter: „Et ehsch weed deer et Blot jemesse, dann kriss do enen Kolesterinspejel verpass, wo mer suwiesu nit wesse, wohin domet, un jetz fängs do och noch met der Stoffwääßelerei an. Kättche, ich jevv deer enen jode Rot. Do muss der Dokter wääßele!...“